Opinión en Galicia

Entendemos que hai morosos voluntarios e involuntarios. Voluntarios, os que non pagan aínda que poidan facelo; involuntarios, os que as circunstancias económicas non lles permiten facer frente ós pagos previstos.

Os morosos involuntarios produciranse pola minoración dos ingresos previstos ou o aumento dos gastos, de xeito que os cálculos inicialmente efectuados non responden ós resultados posteriores.

Vimos de coñecer que os impagos dos morosos involuntarios aumentaron en Galicia case un vintedous por cento o pasado 2007, cun importe de máis de catrocentos corenta millóns de euros. E entendemos que son morosos involuntarios porque as entidades crediticias saben moi ben a quen lle conceden un crédito.

Mal síntoma é este, cando se trata de pagos de bens ou servizos comprados a prazos, sexan unha viaxe ou un televisor, uns mobles ou un automóbil.

Que os resultados a escala do estado español sexan peores (case un vinteoito por cento de incremento), non mellora para nada a situación de Galicia, que evidencia unha importante incidencia negativa nos milleiros de economías do noso país, expostas a vaivéns incontrolados como o paulatino incremento de intereses por parte das entidades de crédito.

Os morosos voluntarios non merecen mención. Os involuntarios, merecen que as condicións económicas melloren, porque deles depende boa parte da tranquilidade económica do País.