Noticias

Pesca destinará más de 800.000 euros al Plan de Recuperación de la Ría do Burgo

Nota de prensa remita por el Gabinete de Comunicación de la Consellería de Pesca e Asuntos Marítimos de la Xunta de Galicia:

O Consello da Xunta autorizou a sinatura de dous convenios de colaboración entre a Consellería de Pesca e Asuntos Marítimos e a Confraría de Pescadores da Coruña, mediante os que o departamento que dirixe Carmen Gallego achegará un total de 807.550 euros para o plan de recuperación da Ría do Burgo. Nestas accións estarán implicados tanto mariscadores a pé como a flote do devandito pósito e a partida financiarase con cargo aos Orzamentos Xerais de Galicia e será susceptible de ser cofinanciada polo Fondo Europeo de Pesca (FEP).

Así, o Goberno galego deu o seu visto e prace á subscrición dunha addenda que amplía e prorroga o protocolo que xa puxeron en marcha Pesca e a confraría coruñesa en marzo deste ano e que afecta ás mariscadoras a pé. Ademais, o Consello autorizou un novo convenio entre o departamento que dirixe Carmen Gallego e o devandito pósito para a realización do plan de recuperación produtiva do marisqueo a flote na Ría da Pasaxe en 2008.

Estas actuacións forman parte das iniciativas que está impulsando a Consellería de Pesca para paliar a diminución de ingresos á que se ven abocados os traballadores do mar en varias rías galegas pola clasificación das súas zonas de produción de moluscos bivalvos como “C”, o que lles impide comercializar en fresco o recurso extraído nestas áreas.

Addenda do convenio que afecta aos mariscadores a pé

En relación á addenda, cabe sinalar que, por unha banda, amplía en 58.327,58 euros o importe recollido no convenio subscrito o 9 de marzo de 2007 (1.151.462,40 euros) para o desenvolvemento das actividades previstas ata finais de decembro á vista dos traballos pendentes. Por outra banda, supón a prórroga do protocolo asinado o pasado mes de marzo ata o 30 de xuño do próximo exercicio.

As actuacións que a confraría se compromete a realizar, mediante a participación das mariscadoras a pé, son: acondicionamento e rexeneración dos bancos marisqueiros, vixilancia e accións formativas. No primeiro punto, as mariscadoras levarán a cabo a limpeza de mexillón nos bancos que están sendo invadidos por esta especie, así como de restos antropóxenos (madeiras, ferros, plásticos,...); acondicionarán o substrato nos bancos do intermareal; farán achegas de area; accións de semicultivo, e desenvolverán traslados de marisco.

En canto á vixilancia, a presenza das patrullas de mariscadoras na Ría durante a baixamar considérase moi importante como efecto disuasorio e unirase ás tarefas neste eido do Servizo de Gardacostas, das forzas e corpos de seguridade do Estado e dos vixilantes da confraría. Pola súa banda, a actividade formativa proposta céntrase na realización dun curso completo de recolector de algas.

Ademais, o pósito comprométese a programar e distribuír os traballos, así como o seu efectivo desenvolvemento; facer un seguimento xunto coa Consellería das accións; e proporcionarlle ao departamento autonómico a información que sobre as actuacións contempladas no convenio lle sexa requirida.

Para estas accións Pesca destinará 574.861,20 euros que serán aboados unha vez se vaian realizando os traballos e a Confraría vaia presentado a documentación exixida. O plan de traballo prevé 10 días mensuais de actividade, con quendas de catro horas (dúas antes e outras dúas despois da baixamar) e polos cales cada mariscadora percibirá 82 euros por xornada, mentres que o pósito percibirá por parte de Pesca un cinco por cento do importe das tarefas de cada mes polo seu labor de coordinación e control dos traballos.

Convenio cos mariscadores a flote

A clasificación da Ría do Burgo como zona “C” tamén afectou aos mariscadores a flote que non puideron comezar a campaña extractiva e que coa finalidade de paliar os efectos da inactividade tamén asinaron un convenio coa Consellería de Pesca o pasado 2 de novembro, que estará vixente ata o final deste mes.

En vista da proximidade desta data e dos resultados do seguimento da calidade das augas considérase conveniente consensuar unha nova proposta de actuación. É por isto que o departamento autonómico e a Confraría coruñesa subscribirán un novo protocolo, con vixencia ata o 30 de xuño de 2008, para a realización do plan de recuperación produtiva do marisqueo a flote, que contará cunha achega da Consellería de 174.361,22 euros.

Ao abeiro deste convenio, os mariscadores a flote terán que desenvolver tres tipos de actividades: limpeza de mexillón e restos antropóxenos na canle da autorización marisqueira; acondicionamento desas áreas unha vez queden limpas; e traslados de ameixa babosa dende a canle de autorización ata a de libre marisqueo e o banco do Parrote, sempre que o aconsellen os ditames dos biólogos da Consellería.

Neste caso proponse un plan de traballo de 48 días, que se desenvolverá preferentemente entre os meses de xaneiro e abril, percibindo cada traballador 82 euros por cada xornada, mentres que o pósito percibirá por parte de Pesca un cinco por cento do importe das tarefas de cada mes por actividades de xestión e control dos traballos.