Notas de prensa

Inaugúrase en Bos Aires a exposición Nós mesmos

Inaugúrase na Delegación da Xunta de Galicia en Buenos Aires a exposición Nós Mesmos, do Consello da Cultura Galega e a Secretaría Xeral de Emigración do Goberno galego, sobre o movemento asociativo das emigrantes galegos en todo o mundo.
Esta mostra recolle a historia da organización dos cidadáns galegos residentes no exterior desde os seus inicios ata a actualidade. No seu percorrido, o visitante poderá coñecer os casos máis destacados de centros, asociacións e entidades da colectividade en todo o mundo, saber da motivación dos seus creadores e as vantaxes dos seus asociados.

A creación de sociedades ou agrupacións de orixinarios de Galicia, as súas provincias, comarcas ou municipios é unha constante da historia da emigración en todo o mundo. Estas agrupacións xurdiron cuns obxectivos de atención ao emigrante no seu país de destino pero tiveron repercusións no propio país de orixe. A creación 235 colexios na xeografía galega por parte das sociedades galegas de instrución radicadas en América é un dos exemplos desta contribución.

Segundo salientan os seus organizadores “entre 1907 e 1912, ademais dos grandes centros, fóronse construíndo outras asociacións que fixeron deste asociacionismo étnico unha vasta rede de microsociedades, que foi un dos trazos máis senlleiros da emigración galega no contexto das colectividades emigrantes de orixe europeu asentadas en América”.

Recoñecemento mutuo no exterior

“A historia da emigración galega está imbricada de moitas experiencias e iniciativas. Unhas son propiamente individuais ou familiares e teñen que ver de forma directa coa decisión de desprazarse dun sitio a para outro; neste caso, desde unha terra de orixe, que é Galicia, ata os máis diversos recunchos do planeta. Outras foron máis colectivas, orixinándose na solidariedade comunal das emigrantes que, lonxe da súa terra, se recoñecen mutuamente como posuidores dunha certa identidade étnica e cultural común”, explica o presidente do Consello da Cultura Galega, Ramón Villares no texto introductorio da exposición.

Inauguración oficial

A apertura oficial da exposición corre a cargo do Secretario Xeral de Emigración da Xunta de Galicia, Manuel Luis Rodríguez, e constitúe un dos actos centrais da programación do Mes de Galicia en Arxentina.

A mostra permanece aberta ao público durante un mes na sala Maruxa Boga da Delegación da Xunta de Galicia en Bos Aires (25 de maio 555 CABA) en horario de atención ao público, de 9 a 14 horas.

66 paneis con fotos e datos históricos

En total, son 66 paneis con fotos e datos que “fan un percorrido sintético, ordenado cronoloxicamente, pola historia das entidades fundadas polas emigrantes galegos a través das propias imaxes e voces dos protagonistas do fenómeno da integración comunitaria”, tal e como salientan os comisarios da mostra Pilar Cagiao Vila e Vicente Peña Saavedra.