Notas de prensa

A Deputación de Lugo intégrase na Fundación Galicia Europa

A Fundación Galicia Europa integrará á Deputación de Lugo ao seu Padroado, como membro asociado, logo de que o secretario xeral de Exteriores, Julio Fernández Mato, e o presidente desta institución, José Ramón Gómez Besteiro, así o articulasen no decurso dunha xuntanza de traballo mantida na sede da Deputación. A de Lugo era, ata o de agora, a única das deputacións provinciais galegas que carecía de presenza e representatividade no Padroado da Fundación Galicia Europa, que preside Emilio Pérez Touriño.

Logo da xuntanza, o secretario xeral de Exteriores e o presidente da Deputación coincidiron en destacar a relevancia da adhesión da Deputación de Lugo ao Padroado da Fundación como membro asociado. “Queremos darlle á Deputación a benvida á Fundación porque estamos seguros que, dalgunha maneira, será voceira dos pequenos concellos de Lugo que teñen máis dificultade para participar dos fondos europeos e, polo tanto, a Deputación será un interlocutor privilexiado nesta función”.

Ao tempo, Fernández Mato destacou que a Deputación de Lugo poderá beneficiarse, cando se formalice esta adhesión, das potencialidades do futuro Centro de Negocios que a Fundación Galicia Europa posuirá en Bruxelas. Neste sentido, o secretario xeral de Exteriores considerou tamén que técnicos do seu departamento asesorarán, a partir de agora, á Deputación de Lugo en todo o que ten que ver “con solicitudes de proxectos europeos” para a obtención de fondos que esta entidade queira demandar.

Patrimonio da Humanidade

Ademais, o secretario de Exteriores da Xunta referiuse a Lugo e a súa Muralla, declarada Patrimonio da Humanidade pola UNESCO, e salientou que se terá en conta a cidade á hora de promover os acordos e convenios que a Xunta ten programados coa UNESCO e que se materializaron na visita do presidente do Goberno galego, Emilio Pérez Touriño, a París, onde tivo ocasión de reunirse co director xeral da UNESCO, Koichiro Matsuura.

Pola súa banda, Gómez Besteiro destacou a importancia que tivo o acto de hoxe, xa que dá continuidade á política iniciada no pasado mes de xullo de “restablecer pontes e volver a falar con administracións e institucións coas que non existía relación”. Neste sentido, o mandatario provincial subliñou que coa adhesión da Deputación á Fundación Galicia Europa sáldase unha débeda que o ente provincial tiña pendente con esta Fundación e coa Secretaría Xeral de Relacións Exteriores da Xunta de Galicia. “A Deputación vai tocar moitas portas e a falar fóra de Galicia. Precisamente, nestes momentos estamos cunha delegación do Concello de Lugo en China. Tíñamos unha débeda pendente e agora soldamos unha relación coa Fundación”.

O titular do ente provincial explicou tamén que a dita adhesión vén propiciada polo interese do Presidente da Xunta en que a Deputación se sume como socia ó igual que xa son o resto das institucións provinciais. “Nós queremos compartir eses foros onde están o resto das Deputacións e a propia Presidencia da Xunta de Galicia. A idea de unir Lugo-Galicia-Europa está presente nesta xuntanza e nos proxectos que faremos a partir de agora”.

Fundación Galicia-Europa

A Fundación Galicia Europa (FGE) colabora con todas aquelas entidades galegas que participan na realización de proxectos no marco de programas de axuda europeos. A colaboración prestada supón un apoio importante para o lanzamento de novas iniciativas e proxectos de interese para Galicia no marco europeo, ademais de contribuír a preparar á sociedade galega para competir polos fondos comunitarios con rexións máis desenvolvidas da UE.

Trátase dunha Fundación sen ánimo de lucro, creada con fin de promover todas as accións que propicien o achegamento entre Galicia e Europa, tendo como obxectivos principais facer de Galicia unha rexión forte no continente, fomentar a participación galega en proxectos europeos, impulsar a influencia dos sectores produtivos galegos na UE e informar e formar á sociedade galega e ás entidades que desexen participar en proxectos europeos.

A FGE creouse no ano 1988. Integrada por diversas entidades públicas e privadas, está vinculada funcionalmente á Secretaría Xeral de Relacións Exteriores da Xunta de Galicia e está aberta á colaboración con outras entidades que persigan os mesmos fins. Coa adhesión da Deputación de Lugo, as catro institucións provinciais galegas figuran como socios desta Fundación.