Notas de prensa

O piloto de rallyes Avelino Basanta presenta o seu KA adaptado

O piloto de rallys Avelino Basanta foi recibido polo vicepresidente da Deputación, o nacionalista, Antón Bao. Basanta chegou, ata os xardíns do Pazo de San Marcos, no seu coche de competición adaptado. Avelino Basanta explicoulle a Antón Bao as especiais características e modificacións realizadas no vehículo para que este poida ser manexado por persoas, que como Avelino, padecen limitacións físicas importantes. Avelino achegouse á deputación acompañado do Presidente da Asociación Basanta Motor Sport.

Antón Bao sinalou a Avelino Basanta como “un auténtico exemplo de superación e de integración a través do deporte”. O vicepresidente da Deputación, nunhas palabras aos medios de comunicación, quixo resaltar que Avelino é un dobre exemplo para os mozos e mozas, tanto como testemuña directa das nefastas consecuencias que poden chegar a ter os accidentes de tráfico, como pola capacidade de sacrificio e ánimo de superación que Avelino demostrou ata chegar a acadar o seu obxectivo de converterse en piloto de rallyes. Antón Bao engadiu tamén que “as áreas gobernadas, na Deputación de Lugo, pola forza política que represento teñen entre os seus obxectivos a promoción do deporte e posibilitar a igualdade de oportunidades para todas as persoas. Iniciativas como a de Avelino Basanta e da Asociación Basanta Motor Sport teñen un interese manifesto, tanto para a promoción do deporte galego, como para a integración de persoas con capacidades diferentes a través do deporte”

Este piloto, nado en Muimenta no ano 1977, sufriu un grave accidente de tráfico o 17 de agosto de 2002 en A Campiña cando o vehículo que conducía se empotrou nunha farola. Tras volcar, o coche incendiouse e Avelino padeceu queimaduras en case o 80 % do seu corpo. Tras máis de 200 días de ingreso hospitalario, no que sufriu a amputación da perna esquerda, Avelino iniciou un longo proceso de rehabilitación para superar as graves secuelas producidas polas queimaduras e a perda de mobilidade nunha das súas mans. Tras participar en varios rallys como copiloto Basanta púxose, por primeira vez, aos mandos dun Peugeot 106 GTI no ano 2006.

UN TRIUNFO E UN OBXECTIVO
Avelino Basanta ven de acadar, a pasada fin de semana, o segundo posto no Grupo A da Clase 6 do Rally de Narón. Para o piloto lugués acadar este segundo posto supuxo un auténtico triunfo. Nesta proba, na que Basanta estreaba o seu Ford Ka adaptado, o obxectivo era o de chegar ata a meta sen complicacións. Avelino Basanta tivo que facer un auténtico exercicio de conducción, co seu novo coche, xa que somentes tivo tempo a adaptar o embrague e o acelerador, o freno tivo que manexalo co pe o que supón para el un verdadeiro problema debido ás súas limitacións físicas.

O próximo obxectivo de Avelino Basanta é poñer en marcha unha escola de pilotaxe para persoas con discapacidade. Para poder poñer en marcha este obxectivo constituíuse a Asociación Basanta Motor Sport. O vicepresidente da Deputación, o nacionalista Antón Bao, recibiu con interese esta proposta e manifestou a súa disposición para facer xestións encamiñadas a posibilitar os medios necesarios que sirvan para apoiar esta iniciativa que xunta a promoción do deporte e a integración das persoas con capacidades diferentes.