Notas de prensa

Pesca promociona os produtos do mar galegos na Feria del Mar de Andalucía

A Consellería de Pesca e Asuntos Marítimos participa na segunda edición da Feria Andaluza del Mar (Famar) que se celebra en Isla Cristina (Huelva) ata o sábado día 29. O departamento autonómico asiste a esta cita cun stand de 100 metros cadrados, no que, ademais de presenza institucional, ten cabida unha representación do sector acuícola e conserveiro.

A Administración pesqueira galega acude a este certame co obxectivo de promocionar os produtos pesqueiros e marisqueiros galegos en Andalucía, principalmente as conservas e o mexillón. Por esta razón, Pesca levará a cabo diferentes actividades promocionais no seu stand, destacando as degustacións dos nosos recursos, á vez que continuará a promocionar a marca de calidade para os produtos da baixura e o marisqueo, “pescadeRías, de onde se non?”. Este distintivo vén etiquetando diferentes especies dende o pasado 7 de marzo, o que proporciona valor engadido aos produtores así como seguridade aos consumidores.

Ademais do stand que a Consellería ten en “Famar”, o apoio de Pesca a esta cita faise evidente coa asistencia do director xeral de Estruturas e Mercados da Pesca, José Manuel López Rodríguez, ao acto inaugural deste evento, celebrado esta mañá. O representante do departamento autonómico tamén realizará unha visita ás instalacións da Feria Andaluza del Mar.

A segunda edición de “Famar” constitúe un dos eventos de carácter pesqueiro e profesional máis importantes en Andalucía. Así mesmo, este ano a feira cobra aínda maior relevancia ao coincidir en data e lugar co encontro organizado polo Clúster de Empresas Pesqueras en Países Terceros.

Outras citas

O apoio aos produtos do mar galegos e ás empresas galegas vinculadas ao sector marítimo-pesqueiro é unha aposta da Consellería de Pesca e Asuntos Marítimos e así se vén manifestando a través da participación en diversos certames nacionais e internacionais dende comezos de 2008. En concreto, asistiu á feira Fish International que se celebrou en Bremen (Alemaña), participou no Fórum Gastronómico Santiago´08 e estivo presente na Mediterranean Seafood Exhibition de Rímini (Italia), así como no Salón Galego de Gastronomía e Turismo, Xantar 2008, en Ourense no Salón Internacional de Alimentación e Bebidas, Alimentaria 2008, que tivo lugar en Barcelona.

Ademais, en próximas datas, o departamento que dirixe Carmen Gallego participará, como vén sendo habitual, no Salón Gourmet de Madrid e na cita internacional European Seafood Exposition de Bruxelas.