Notas de prensa

Pesca, satisfeita polo novo buque de loita contra a contaminación

A Consellería de Pesca e Asuntos Marítimos quere amosar a súa satisfacción polo anuncio feito polo Ministerio de Fomento respecto á adxudicación da nova embarcación de loita contra a contaminación que terá o seu porto base na Coruña e que servirá para reforzar os medios de recollida de hidrocarburos dos que dispón na actualidade a nosa comunidade autónoma.

O cumprimento do Plan Nacional de Salvamento Marítimo respecto a Galicia é, a día de hoxe, moi alto e a comparativa entre os medios dos que se dispón na actualidade para a loita contra a contaminación e tarefas de salvamento e dos que se dispoñía na anterior lexislatura non deixa lugar a dúbidas. Deste xeito, dende o ano 2006 a nosa comunidade conta cun remolcador de 80 mts de eslora que entrou en funcionamento en decembro de 2006. O “Don Inda” ten 20.600 CV de potencia e unha capacidade de recollida de hidrocarburos da auga de 1.750 metros cúbicos.

No que respecta aos medios aéreos, en xuño de 2007 presentouse o avión de longo alcance “Rosalía de Castro”, que ten base en Lavacolla. Ademais, incrementáronse as infraestruturas de salvamento coa contratación dunha base loxística en Vilar do Colo (Fene). A estes medios vén a sumarse agora a nova unidade marítima recolledora e de almacenamento de hidrocarburos, que ten prevista a súa entrada en servizo para comezos do verán, cunha capacidade de almacenamento de 3.100 metros cúbicos.

A Consellería de Pesca quere destacar tamén que a adxudicación anunciada hoxe polo Goberno central é froito do traballo conxunto das dúas administracións nesta materia, plasmada nun convenio de colaboración asinado en setembro de 2006 pola Ministra de Fomento, Magdalena Álvarez, e o presidente da Xunta de Galicia, Emilio Pérez Touriño.