Notas de prensa

Segundo debate do Estado da Autonomía do Goberno bipartito (PSdeG-BNG)

O titular do Goberno galego, Emilio Pérez Touriño, analiza no seu segundo Debate sobre o Estado da Autonomía como presidente da Xunta os principais eixes que sustentaron as políticas do seu Executivo nestes dous anos de goberno e trazará as liñas estratéxicas do próximo bienio. Touriño anuncia relevantes medidas en materia económica, social e de ordenación territorial que se porán en marcha proximamente, o que evidencia o compromiso do Goberno que preside coa aposta polo crecemento económico da Comunidade Autónoma, coas políticas sociais e coa necesidade de acompañar o crecemento económico e a mellora social cun modelo de desenvolvemento territorial e ambiental sustentable e equilibrado.

Na súa intervención, o presidente do Goberno galego porá en valor as políticas desenvolvidas pola Xunta ao longo destes dous anos enxalzando, especialmente, as políticas económicas que sentaron as bases dun novo modelo de desenvolvemento, así como as políticas de emprego e as políticas sociais que afectan a áreas específicas como a educación, a sanidade ou á vivenda, entre outras.

Touriño referendará no seu discurso a boa marcha da economía galega, que leva dous anos medrando por enriba da media estatal, e destacará medidas impulsadas de fondo calado social como a posta en marcha da gratuidade dos libros de texto, a extensión da figura do acompañante escolar e dos comedores, a ampliación do programa de saúde bucodental ou a redución das listas de espera.

Pérez Touriño tamén salientará os pasos dados para potenciar un modelo sanitario público e de calidade, ao terse incrementado o orzamento destinado a este capítulo baixo o seu mandato en case 1000 millóns de euros e terse reducido a totalidade da débeda esixible, ao tempo que se iniciou o proceso para a supresión das fundacións sanitarias.

Paralelamente, referirase ao compromiso do Goberno galego coas políticas de vivenda que se ten traducido no impulso de programas de axuda ao acceso á vivenda en aluguer, especialmente para mozos e persoas con rendas máis baixas, ou o forte pulo dado ao proceso de cualificación de vivenda protexida nesta lexislatura.

Así mesmo, lembrará os esforzos realizados para a prevención e tratamento integral da violencia de xénero, coa primeira lei galega nesta materia ou as axudas económicas ás vítimas de malos tratos, así como a constitución do consorcio de servizos sociais. Así mesmo, o titular da Xunta resaltará á relevancia da conformación das mesas de diálogo social e o pacto polo emprego acadado cos sindicatos.

Tamén porá en valor o presidente da Xunta as decisións adoptadas polo seu Goberno en materia de peaxes, coa supresión das de Rande, A Barcala e Dozón-Ourense. E remarcará o feito de que o seu Goberno estea a promover o triple de quilómetros de vías de alta capacidade que os gobernos do PP, ademais de salientar o impulso dado ás políticas de ordenación territorial, que teñen na lei de medidas urxentes de protección do litoral un expoñente senlleiro como dique de contención contra a especulación e a degradación do solo.

En materia ambiental, o presidente salientará as políticas adoptadas polo Goberno que preside para protexer o medio e potenciar o saneamento e depuración de augas, como o Plan de Saneamento Integral das rías, dotado con máis de 650 millóns de euros para corrixir os graves déficit herdados neste eido. Asemade, apuntará as grandes liñas estratéxicas do Goberno neste ámbito de cara ao resto de lexislatura.